Con motivo do Día Internacional dos Arquivos que se conmemora o 9 de xuño, o Arquivo Histórico Universitario promove unha xornada de difusión dos seus fondos documentais
O Arquivo Histórico Universitario celebra o Día Internacional dos Arquivos cunha actividade de difusión dos seus fondos documentais. O venres 9 de xuño, das 10.30 e as 13:30 horas promove unha xornada que leva por título 'Os arquivos do Seminario de Estudos Galegos: herdanza documental e memoria de Galicia', que se suma aos actos organizados por distintas institucións culturais, en colaboración co Consello da Cultura Galega, para conmemorar o centenario da súa fundación do SEG.
Así, a xornada contará coa participación das principais entidades e fundacións que custodian arquivos persoais de membros do SEG xunto ao que conformou o propio Seminario durante a súa prolífica actividade, como o Instituto de Estudos Galegos Padre Sarmiento, o Museo de Pontevedra, a Fundación Penzol, a Fundación Vicente Risco e a Fundación Otero Pedrayo.
O vicerreitor de Política Científica da USC, Vicente Pérez Muñuzuri, abrirá ás 10.30 horas este foro que se desevolverá na Sala de Conferencias do AHUS e que contará coas intervencións de Desirée Mª Domínguez Pallás, directora do Arquivo; Eduardo Pardo de Guevara, director honorario do Instituto de Estudos Galegos Padre Sarmiento; María Jesús Fortes Alén, arquiveira do Museo de Pontevedra; Patricia Arias Cachero, secretaria da Fundación Otero Pedrayo; Benito Ramírez Abal, arquiveiro da Fundación Penzol; e Celia Pereira Porto, presidenta da Fundación Vicente Risco.
