XuvenCiencia presenta proxectos desenvolvidos no Convivio de Ciencia no marco dun congreso no CPI do Courel
A rede de Estudantes da Montaña Conciencia2, integrada polos CPI do Courel, Pedrafita, Navia de Suarna e Cervantes e polos Ies de Becerreá e A Fonsagrada, celebra os días 15 e 16 de xuño no CPI Uxío Novoneyra do Courel a quinta edición do seu encontro anual, un foro no marco do que se desenvolverá o V Congreso Científico da Montaña, que servirá de escaparate para a presentación e avaliación de cinco dos proxectos científicos desenvolvidos polo estudantado no marco do Convivio de Ciencia, un programa coordinado polo grupo de innovación docente XuvenCiencia do Campus Terra da USC que conta con financiamento da Fundación Española para a Ciencia e a Tecnoloxía (FECYT).
Unha necropsia de robaliza e a análise da auga dunha piscifactoría para determinar a causa do falecemento de peixes, a clonación in vitro e o enraizamento in vivo de acivro e moreira, respectivamente, a transformación dunha impresora 3D convencional nunha impresora braille e a obtención de enerxía a partir de musgo son os cinco proxectos dos que os participantes no Convivio de XuvenCiencia darán conta a partir do xoves no marco desta nova edición do Congreso de Ciencia da Montaña, unha cita durante a que tamén se presentarán outras iniciativas realizadas por alumnado de ensino primario e secundario dos centros integrados na rede Conciencia2, asíc omo por outros estudantes do Centro de Formación e Experimentación Forestal de Sergude (Boqueixón), do IES Xoán Montes, da capital luguesa, e do IES O Couto, en Ourense.
Uxío Novo Rei, da Fundación Uxío Novoneyra, ofrecerá a charla de apertura destas xornadas, que rematarán o venres 16 cun relatorio de clausura a cargo do investigador da USC Julio Rodríguez López. A programación das distintas actividades organizadas ao abeiro do V Congreso Científico da Montaña, que se desenvolverá de xeito presencial, aínda que tamén se poderá seguir por streaming, xa se pode consultar en liña e inclúe, alén da presentación de iniciativas científicas, roteiros, xogos populares e monólogos científicos, da man de Eva Cabanelas.
Unha rede de cultura científica
O proxecto Convivio de Ciencia recibiu o respaldo da Fundación Española para la Ciencia ela Tecnología (FECYT) do Ministerio de Ciencia e Innovación na convocatoria de axudas para o fomento da cultura científica, tecnolóxica e da innovación. A primeira das accións contempladas foi o Campus Convivio, celebrado en outubro de 2022 na sede universitaria luguesa, onde congregou preto de 40 docentes de ensino medio de toda Galicia. Esta acción formativa realizouse coa colaboración dos Centros de Formación e Recursos da Xunta, a través do programa de formación permanente do profesorado, e cada unha das persoas participantes recibiu un kit de experimentación científica de XuvenCiencia para traballar despois na aula con alumnado preuniversitario.
O proxecto Convivio de Ciencia contempla, asemade, a creación dunha Rede Convivio, unha rede de cultura científica integrada polos institutos e colexios dos docentes participantes, que tiveron o cometido de deseñar un proxecto co seu alumnado a partir da formación recibida no Campus Convivio e empregando o kit XuvenCiencia como ferramenta. Unha escolma destes traballos será a que se presente agora no V Congreso Científico da Montaña.
Ata chegar a esta cita, a Rede Convivio mantívose viva grazas á celebración de Cafés Convivio mensuais, unhas reunións informais e telemáticas á imaxe dos lean coffees, que serviron non só para que os responsables de XuvenCiencia fixesen titorías virtuais cos equipos creados nos institutos, senón tamén para manter o contacto e a comunidade. O Magacine Convivio, unha revista científica virtual na que se van expoñendo as investigacións, o desenvolvemento do proxecto e os seus resultados, é a cuarta pata deste proxecto Convivio de Ciencia.