Santiago de Compostela
Sala de descanso
No trixésimo aniversario da creación do centro, a Biblioteca Concepción Arenal rende homenaxe ao persoal docente e investigador que contribuíu á creación de coñecemento no eido desta rama científica, así como á adquisición das competencias transversais e específicas do estudantado
A mostra bibliográfica '30 anos da Facultade de Ciencias Políticas e Sociais (1991-2021)' constrúe na Sala de Descanso da Biblioteca Concepción Arenal un espazo para conmemorar o trixésimo aniversario da creación da Facultade na USC e homenaxear o profesorado e persoal investigador que traballou no centro ao longo da súa historia. A exposición inaugurarase o martes, 26 de setembro ás 12 horas nun acto que contará coas intervencións do reitor Antonio López; do decano da Facultade de Ciencias Políticas e Sociais, Ramón Bouzas; da directora da Biblioteca Universitaria, Mabela Casal; do director da Biblioteca Concepción Arenal, José Rodríguez; do seu anterior director, Francisco Méndez; e da secretaria do Departamento de Ciencia Política e Socioloxía, Isabel Diz.
A mostra bibliográfica recolle os libros máis prestados e unha escolla dos artigos máis relevantes publicados entre 1991 e 2021 do PDI pertencente ao Departamento de Ciencia Política e Socioloxía. Entre os exemplares expostos, inclúese o volume impreso 30 anos da Facultade de Políticas e Sociais: 1991-2021: recompilación bibliográfica, unha edición especial elaborada polo persoal da Biblioteca Concepción Arenal que recolle a produción bibliográfica do PDI entre 1991 e 2021 e que tamén pode ser consultado no repositorio Minerva da USC.