Xornada inaugural do proxecto Mentoring USC Desenvolvemento Profesional

O reitor Juan Viaño preside este mércores, 1 de febreiro, o inicio da segunda edición de Mentoring USC Desenvolvemento Profesional, unha iniciativa que nace coa idea de poñer en contacto o alumnado de máster, graduados/as de último curso e titulados/as no curso académico 2015-2016 con directivos e profesionais de empresas, co obxecto de que estes lles presten orientación e apoio na busca de emprego e no desenvolvemento do seu proxecto profesional.

A presentación deste mércores terá lugar ás 13.00 horas no Hostal dos Reis Católicos e nela está prevista, ademais do reitor, a presenza da vicerreitora de Estudantes, Cultura e Responsabilidade Social, Dolores Álvarez; do secretario xeral de Universidades, José Alberto Díez de Castro; e da concelleira de Igualdade, Desenvolvemento Económico e Turismo, Marta Lois González.

A proposta, que conta co apoio do Consello Social da USC busca reducir a incerteza do alumnado que rematou ou está a piques de rematar a súa etapa universitaria e carece de referencias previas para orientar axeitadamente o seu perfil ao mercado laboral.

Nesta edición participan un cento de mentores e outros tantos mentorizados, aos que hai lle que sumar unha decena de estudantes máis que este ano se unen á tamén segunda convocatoria do Mentoring Inclusivo dirixido a alumnado de máster e último ano de grao que teña acreditada a súa condición de discapacidade. Esta iniciativa está apoiada por Obra Social la Caixa.