Este mércores 3 de abril preséntase na Facultade de Xeografía e Historia a partir das 12.00 horas o libro 'Razón de historia: centenario dos estudos de historia na Universidade de Santiago de Compostela', dirixido polo ex reitor da USC Ramón Villares; o acto será presidido polo reitor da USC Antonio López e asistirán tamén a este acto ademais do director da publicación, o decano da Facultade, Marco García Quintela, e o conselleiro en funcións de Cultura, Educación, FP e Universidades, Román Rodríguez.
Os estudos superiores de Historia cumpriron cen anos en Compostela no curso académico 2022-23, comezando dentro da Facultade de Filosofía e Letras, de modo paralelo aos de Química, que o facían na Facultade de Ciencias, uns principios serodios en comparanza coa maior parte das universidades españolas, dos que foron xurdindo progresivamente diversas especialidades e, finalmente, licenciaturas. A través de estudos, de exhaustivas biografías e testemuños directos, esta obra coral, profusamente ilustrada, proporciona unha estampa, a un tempo evocadora e rigorosa, dun centro universitario senlleiro, que recolle o mellor dos seus cen anos para proxectarse no futuro.