O reitor da USC Antonio López preside a entrega de diplomas
As alumnas e alumnos do programa ESTALMAT-Galicia de estímulo do talento matemático celebran este sábado 4 na Aula Magna da Facultade de Matemáticas o seu acto de clausura de curso, que estará presidido polo reitor, Antonio López. A mesma cerimonia, que dará comezo ás 12.30 horas, servirá de despedida da promoción de 2022, que recollerá os seus diplomas.
No acto o reitor estará acompañado da directora xeral de Ordenación e Innovación Educativa da Xunta de Galicia, Judith Fernández Novo; a decana da Facultade de Matemáticas e presidenta de Estalmat-Galicia, Elena Vázquez Cendón; a coordinadora académica de Estalmat-Galicia, Sandra Díaz Mouro; e o profesor Javier Polo Noche, ex estudante da novena promoción de Estalmat-Galicia e graduado en Matemáticas o pasado curso.
Tamén intervirán a coordinadora das familias de Estalmat-Galicia, Trinidad Pérez López, así como as representantes das familias, Rafael Laso Lorenzo, José María Martínes Matos e Monica Regueira López, e do alumnado, Xiana Clemente García e Pablo París Martínez.
Nesta ocasión, serán 8 alumnas e 19 alumnos de Estalmat-Galicia que conformaron a décimo quinta promoción (2022) quen, acompañados por unha representación das súas familias, recollan os seus diplomas acreditativos, rexistrados na Real Academia de Ciencias Exactas, Físicas y Naturales de España. Tres estudantes desta promoción non acadaron o título por sumarse o segundo ano a outros programas de mobilidade internacional e outras actividades.
Previo ao acto de clausura e recollida de diplomas, terá lugar ás 11.00 horas unha conferencia da profesora e decana da facultade anfitrioa, M. Elena Vázquez Cendón, dirixido a docentes, alumnado e familiares da promoción de 2022, sobre a profesión de Matemáticas.
Estalmat-Galicia
ESTALMAT-Galicia mantén tamén o programa ESTALMAT PI, que supón un terceiro curso, ao que son convidados a participar os xa novos 27 estalmateiros e estalmaterias. Ademais, desde finais do mes pasado Estalmat-Galicia forma parte do proxecto SUMO Valor da USC, desde o que xa achegaron recursos as empresas DXC Technology desde o seu Centro de Excelencia para iniciativas de Datos e Intelixencia Artificial para España e Portugal, con sede en Santiago, e o Centro de Investigación Mestrelab.
Avalado pola Real Academia de Ciencias Exactas, Físicas y Naturales de España, ESTALMAT-Galicia está pilotado por membros da Facultade de Matemáticas da USC e de distintos centros de ensino secundario de Galicia. Conta cun financiamento específico da Consellaría de Educación, Ciencia, Universidades e Formación Profesional, da Axencia Galega de Innovación e das Deputacións da Coruña, Lugo, Ourense e Pontevedra. Entre os colaboradores que achegan material, ademais dos xa mencionados Casio educación.