O simposio ‘Malestares na cultura espec(tac)ular: perspectivas críticas desde a psicanálise’, organizado polo Grupo de Estudos Audiovisuais da Facultade de Ciencias da Comunicación compostelá abordará os días 12 e 13 de xuño as crebas das subxectividades contemporáneas desde un enfoque interdisciplinar que, a partir da constelación común do campo psicanalítico, integra a análise audiovisual, a crítica filosófica e a orientación clínica.
Francisco Conde, psicanalista e profesor de Filosofía na USC, abrirá o simposio o mércores 12 cunha conferencia titulada ‘O triunfo do imaxinario lacaniano: do Edipo ao selfie’. Ese mesmo día, a tamén psicanalista Rosa Vázquez tratará, á súa vez, o rexistro do simbólico e, máis concretamente, a repercusión da súa decadencia tal e como se manifesta no ámbito da clínica de orientación psicanalítica, cunha palestra titulada: ‘A orientación lacaniana no século XXI: decadencia do simbólico, novas modalidades do síntoma e clínica do exceso’.
A segunda sesión, o xoves 13, comezará co relatorio ‘A tiranía da beleza e a máscara dixital nas redes sociais’, a cargo da profesora Antía López, membro do Grupo de Estudos Audiovisuais, que analizará as transformacións da propia identidade no contexto audiovisual virtual. Pechará o simposio a intervención ‘O malestar non é o que pensas. Freud e a cultura’, de Delmiro Rocha, docente da Facultade de Humanidades da USC e filósofo especializado na crítica da cultura e na noción de deconstrución formulada por Jacques Derrida.
A asistencia a este simposio que se desenvolverá da Facultade de Ciencias da Comunicación é libre ata completar a capacidade do espazo, mais prégase inscrición previa no formulario accesible desde a web do simposio ata o luns 10 de xuño.
