Aprobado o calendario académico para o vindeiro curso
O Consello de Goberno da USC aprobou este mércores o calendario académico para o vindeiro curso, que establece o primeiro período de docencia do 11 de setembro ao 18 de decembro (os másteres oficiais poderán retrasar o comezo ata o 25 de setembro) e o segundo do 30 de xaneiro ao 15 de maio de 2018.
Con independencia da data de defensa, a entrega dos TFG/TFM para defender no mes de setembro farase tendo como data límite o 31 de xullo de 2018. A principal novidade deste calendario é que non establece un período de exames, senón de apertura de actas, o que outorga moita máis flexibilidade aos centros para colocar os exames na súa programación.
Os períodos non lectivos serán dende o 23 de decembro ata o 7 de xaneiro, os días 12 e 13 de febreiro, e do 26 de marzo ao 30 de marzo. Ademais, terá carácter festivo e, polo tanto, non lectivo, o luns 29 de xaneiro, día ao que se traslada a festividade de Santo Tomé de Aquino, ademais dos días declarados festivos polo Estado, a Comunidade Autónoma e, en cada Campus, os correspondentes as festas locais.
Prazas do SUR
A convocatoria de prazas para aloxamento no Sistema Universitario de Residencias da USC ofertará un total de 1.071 prazas para o vindeiro curso, sendo a práctica totalidade para alumnado, segundo acordaron hoxe. Os prezos, que se establecen en función da Renda Persoal Dispoñible e do tipo de habitación, van dende os 405 euros aos 2.574 euros por curso. O prazo de solicitude permanecerá aberto dende o 2 de maio ata o 30 de xuño.
Acordo para planificar a oferta
Na mesma xuntanza, ratificouse o acordo que asinaron hai dúas semanas a Consellaría de Cultura, Educación e Ordenación Universitaria e as tres universidades galegas para a definición dos principios reitores da planificación da oferta académica universitaria no Sistema Universitario de Galicia (SUG) ata o curso 2020-2021.
O acordo contempla como principios básicos da ordenación universitaria a planificación conxunta da oferta do SUG e o mantemento do tamaño deste sistema. En canto ás prioridades para os novos graos e máster do SUG, terase en conta que o obxectivo do sistema universitario é a excelencia e a modernización da oferta educativa, “polo que as novas propostas deben aproveitar a competencia das universidades galegas para o desenvolvemento e actualización da oferta, prestando atención a novas oportunidades e novos perfís profesionais para sacar partido das fortalezas das universidades no eido económico e investigador”.
En virtude deste acordo, a consellaría competente fomentará a oferta de títulos de grao interuniversitarios entre as universidades do SUG ou entre estas e universidades de fóra do sistema. Esta medida apicarase preferentemente a títulos duplicados ou cunha alta porcentaxe de solapamento en contidos e materias.
Outros asuntos
Outros asuntos aprobados foron a corrección das táboas de ponderación das materias para a admisión aos estudos universitarios do SUG, a modificación da normativa de Avaliación e rendemento académico e o texto refundido do regulamento de Estudos de doutoramento.