A obra aborda un problema que afecta a toda a poboación mundial debido á existencia dunha desigualdade estrutural baseada no sexo
O reitor Antonio López Díaz preside este luns 30 de setembro, a partir das 12.00 horas no Salón de Graos da Facultade de Relacións Laborais, a presentación do libro de Javier Carballo de Jesús En la brecha del sexo: por un trabajo de igual valor, editado pola Fundación Luís Tilve. Acompañaraos a ministra de Inclusión, Seguridade Social e Migracións, Elma Saiz Delgado, e a vicedecana da Facultade de Relacións Laborais, Silvia Moscoso Ruibal.
Javier Carballo, graduado en Relacións Laborais pola USC e actualmente estudante de doutoramento, ofrece nesta obra unha análise sobre a desigualdade salarial abordando os motivos estruturais e os factores desta fenda entre homes e mulleres, achegando propostas de medidas e accións que poden axudar a combater esta diverxencia.
A obra, con prólogo da ex ministra Carmen Calvo, busca presentar un mapa de recursos xurídicos sobre a igualdade laboral e retributiva do ordenamento xurídico español, e reivindicar o papel dos sindicatos e da negociación colectiva na consecución da igualdade laboral.
