O Congreso Internacional de Educación de Persoas Adultas 'Caxato. O Camiño da Formación' desenvolverase no Centro de Estudos Avanzados da Universidade de Santiago de Compostela os días 30 e 31 de xaneiro como espazo de diálogo e reflexión en torno á Educación de Persoas Adultas (EPA). O encontro inaugurarase o xoves 30 ás 9.30 horas nun acto que contará coa participación da vicerrectora de Cultura e Estudantes, Pilar Murias García; o director xeral de Maiores e Atención Sociosanitaria da Xunta de Galicia, Antón Acevedo Prado; e a coordinadora do Proxecto Caxato da USC, Esther Olveira Olveira.
O congreso materialízase como resultado do proxecto europeo Camiño de Santiago: Camiño de Intercambio e de Aprendizaxe Cultural Europeo (Caxato), que pretende xerar un ecosistema de formación potenciando a adquisición de competencias sociai, de sostibilidade e dixitais a través das artes. O Camiño de Santiago actúa como eixo vertebrador desde o cal as persoas adultas maiores de 50 anos poden ser actores protagonistas da súa experiencia.
Quen desexe asistir deberá rexistrarse obrigatoriamente a través do formulario https://forms.office.com/e/8Nh7iXC76L (inscrición gratuíta).