Axudas de manutención para o curso 2025/2026

A Universidade de Santiago de Compostela (USC) segue a considerar de relevancia, por sexto curso consecutivo, a convocatoria das axudas de manutención dirixidas ao seu estudantado. Estas axudas, iniciadas en 2020 debido á crise económica derivada da enfermidade por coronavirus continúan sendo necesarias, tendo en conta a permanencia da crise económica reflectida na actual conxuntura de escalada de prezos, e que está afectando ao consumo de produtos básicos. 

Obxecto das axudas

As presentes axudas teñen por obxecto sufragar parcialmente os gastos de alimentación do estudantado mediante a emisión de bonos de comedor intercambiables por un menú nos días e períodos lectivos segundo o calendario escolar do curso 2025/26 e na forma e cos requisitos que se establecen nestas bases reguladoras. 

Con esta finalidade emitiranse tres tipos de bonos, entre os que deberán elixir as persoas solicitantes:

• Tipo 1: 80 consumos (repartiranse un máximo de 500 unidades)
• Tipo 2: 60 consumos (repartiranse un máximo de 400 unidades)
• Tipo 3: 40 consumos (o número repartido fixarase en función das solicitudes)

O reparto dos bonos detállase no artigo 7.

Os bonos poderán intercambiarse por un menú diario para levar ou para consumir nas instalacións das cafeterías ou comedores que se relacionan a continuación, na franxa horaria do mediodía, coa posibilidade de retirar un menú adicional para levar de luns a xoves ou até dous menús adicionais os venres:
 

Cafetería / Comedor	Campus
Colexio Maior Fonseca	Santiago Sur
Colexio Maior Rodríguez Cadarso	Santiago Sur
Edificio Docente Roberto Novoa Santos	Santiago Sur
Escola Técnica Superior de Enxeñería	Santiago Sur
Fac. Ciencias da Comunicación	Santiago Norte
Fac. Ciencias da Educación e Psicoloxía	Santiago Sur
Fac. Económicas e Empresariais	Santiago Norte
Fac. Filoloxía	Santiago Norte
Fac. Matemáticas	Santiago Sur
Fac. Medicina	Santiago Histórico
Residencia Universitaria Burgo das Nacións	Santiago Norte
SEU Santiago	Santiago Sur
Fac. ADE	Lugo
Fac. Humanidades	Lugo
Fac. Veterinaria	Lugo

Información para o uso dos bonos

Para facer uso dos bonos é preciso que instales a app da USC, amoses a túa “Tarxeta virtual” ao persoal do comedor e lle indiques que queres facer uso do teu bono.

Cando realices o consumo dun bono recibirás un correo electrónico indicando os consumos restantes. Tamén poderás consultar os detalles do teu bono no seguinte enderezo:

https://aplicacions.usc.es/menuusc/publica/bonos

Tes máis información no seguinte vídeo:

Requisitos das persoas beneficiarias

Poderá participar nesta convocatoria o estudantado da Universidade de Santiago de Compostela (USC) que cumpra os seguintes requisitos:

Requisitos académicos

• Estar matriculado/a no curso 2025/26 en estudos conducentes á obtención dun título oficial de grao ou mestrado en calquera centro da USC.
• Non estar en posesión ou en condición de posuír un título do mesmo ou superior nivel ao dos estudos nos que se matricula para solicitar a axuda.
• Formalizar matrícula de, polo menos, 30 créditos, ou no caso de estudos de grao, formalizala dos créditos restantes para rematar os estudos.
• Non poderá participar o estudantado que estea cursando na USC un programa de mobilidade entrante nacional ou internacional. O estudantado da USC que vaia cursar un programa de mobilidade parcial, nun único semestre, poderá participar na convocatoria tendo en conta que optaría a un bono do Tipo 3. 

Requisitos económicos

Os requisitos económicos referiranse á Renda Persoal Dispoñible (RPD) da persoa solicitante, que non poderá superar os 9.000 euros, segundo o procedemento de cálculo que se indica no primeiro punto deste apartado, así como á existencia de situacións laborais e económicas de especial gravidade posteriores ao ano 2024 previstas no segundo punto, que haberán de xustificarse documentalmente. Neste último suposto, poderase optar ás axudas aínda que no exercicio correspondente para o cálculo da RPD se superasen os 9.000 euros. 

Presentación de solicitudes

1. O prazo para presentar as solicitudes estará aberto entre o 22 de setembro e o 1 de outubro de 2025
2. As solicitudes presentaranse obrigatoriamente por medios electrónicos en dúas fases:
   1. A través da Sede Electrónica da USC enchendo o formulario normalizado de solicitude que está dispoñible no seguinte enderezo: https://sede.usc.es/sede/publica/catalogo/procedemento/175/ver.htm
   2. A través da plataforma do Banco Santander accedendo ao seguinte enderezo: http://app.santanderopenacademy.com/program/axudas-para-manutencion-do-estudantado-da-usc-durante-o-curso-2025-2026
3. As solicitudes que non completen integramente as dúas fases teranse por desistidas e a persoa non poderá optar ás axudas