A Facultade de Administración e Dirección de Empresas da USC inaugura o curso académico 2025-2026 cunha conferencia a cargo de Salva Arco Frías, director xeral do Club Baloncesto Breogán SAD e ex xogador profesional de baloncesto. Baixo o título 'Da pista á empresa: valores que inspiran', a charla terá lugar o xoves 16 de outubro ás 12.30 horas na Aula Magna da Facultade de ADE. Durante a súa intervención, Salva Arco compartirá a súa experiencia persoal e profesional, establecendo paralelismos entre o deporte de alto rendemento e a xestión empresarial. Abordará valores como o esforzo, o liderado, o traballo en equipo e a superación, explicando como estes principios poden servir de guía tamén no ámbito organizativo e directivo.
Nado en Navàs (Barcelona) en 1984, Salva Arco desenvolveu unha destacada carreira como xogador profesional de baloncesto durante 19 tempadas, disputando máis de 600 partidos entre ACB, LEB e Eurocup. Foi protagonista de catro ascensos á ACB (GBC 2008, Ourense 2015, Breogán 2018 e 2021) e capitán do Club Baloncesto Breogán, onde se converteu nun referente dentro e fóra da pista.
Graduado en Marketing e Investigación de Mercados pola Universitat Oberta de Catalunya (UOC), foi distinguido co Premio Extraordinario ao Mellor Expediente Académico. Tras a súa retirada como xogador, dirixiu a Fundación Breogán (2021–2024), impulsando proxectos sociais, deportivos e educativos, e dende 2024 exerce como Director Xeral do C.B. Breogán, liderando o desenvolvemento institucional e estratéxico do club. Ademais, é fundador e director do Campus Arco, un programa formativo e deportivo dirixido á mocidade.