O curso de verán da USC en Lalín busca incrementar a conciencia sobre a violencia de xénero na sociedade civil

Por décimo terceiro ano consecutivo, o Auditorio Municipal de Lalín acollerá este mes de xullo o curso ‘ Novas fronteiras na igualdade de oportunidades 2.0’, nesta ocasión centrado na violencia de xénero e as estratexias a implementar no eido educativo. A matrícula deberá formalizarse en liña ata o 7 de xullo.

As súas directoras, María José Méndez Lois e María Jesús Payo Negro, márcanse como obxectivos incrementar a conciencia sobre a violencia de xénero na sociedade civil e non limitar así o debate sobre os medios para combater as violencias. Ademais, tratarán de coñecer boas prácticas para o desenvolvemento de actuacións igualitarias na escola revisando ferramentas habitualmente empregadas.

Cada unha das catro xornadas do curso, a desenvolver entre o 18 e o 21 de xullo, dedicarase a un aspecto concreto -violencias, diversidade, coeducación e emocionalidade­, tratado por profesionais dos diferentes ámbitos de intervención relacionados coa igualdade de oportunidades.

Este curso está co organizado pola Oficina de Igualdade do Concello de Lalín e conta con financiamento do Concello de Lalín.