Conferencia de Teresa Ribera sobre os desafíos ambientais do século XXI

A directora do Instituto de Desenvolvemento Sostible e Relacións Internacionais de París (IDDRI), Teresa Ribera, impartirá este xoves 1 unha conferencia-coloquio sobre os desafíos ambientais do século XXI. Esta é unha nova actividade do ciclo ‘Ler o Mundo hoxe...’ dedicado nesta ocasión á sustentabilidade ambiental e que organiza o grupo de investigación en Pedagoxía Social e Educación Ambiental da USC (SEPA). A sesión comezará ás 18.30 horas no Auditorio do Centro Galego de Artes Contemporánea.

Con anterioridade ao inicio desta conferencia, entre as 16.00 e as 18.00 horas, realizarase unha visita polas hortas urbanas de Santiago que guiará Kylyan Marc Bisquert Pérez, do grupo de traballo de Desenvolvemento Comunitarios e Educación Ambiental A Eira do Colexio de Educadores e Educadoras Sociais de Galicia. A visita partirá do Centro de Interpretación Ambiental de Compostela no parque de Belvís.

Teresa Ribera foi secretaria de Estado para o Cambio Climático do goberno español entre 2008 e 2011, responsable das políticas ambientais e de cambio climático así como da Axencia Estatal de Meteoroloxía. Despois dun breve paso pola industria das enerxías renovables, incorporouse ao IDDRI como asesora en Política Climática Internacional, pero asumir a súa dirección en 2014.

É licenciada en Dereito e Diplomada en Dereito Constitucional e Ciencia Política do Centro de Estudos Constitucionais, así como membro do Corpo Superior de Administradores Civís do Estado. Ademais, é colaboradora habitual de think tanks e organizacións non gubernamentais, así como de diferentes organismos internacionais. Preside a xunta asesora do Momentum for Change UNFCCC Initiative e é integrante do World Economic Forum’s Global Advisory Council on Climate e do UNSDSN’s Global Leadership Council.