A directora da Biblioteca da USC asume a secretaría executiva de REBIUN

A directora da Biblioteca Universitaria Mª Isabel Casal Reyes asume para os dous vindeiros anos a secretaría executiva da Rede de Bibliotecas Universitarias Españolas (REBIUN), comisión sectorial da Conferencia de Reitores das Universidades Españolas (CRUE). A designación de Mª Isabel Casal adoptouse na XXIV Asemblea Anual que a rede celebrou a mediados de mes na Universitat de les Illes Balears.

A directora da Biblioteca compostelá incorporouse á executiva desta rede en 2014, e dende aquel momento coordinou a Liña Estratéxica encargada de dar soporte á docencia, aprendizaxe, investigación e xestión, función que se sumaba á participación da USC nos grupos de traballo sobre Catálogo Colectivo, Patrimonio Bibliográfico e, a partir de 2015, sobre Repositorios.

REBIUN constitúe un organismo estable no que están representadas todas as bibliotecas universitarias e científicas españolas. Así, forman parte dela as bibliotecas das 76 universidades que integran CRUE (50 de ámbito universitario público e 26 de ámbito universitario privado), así como o CSIC (Consejo Superior de Investigaciones Científicas).