A comunidade universitaria xa pode inscribirse nos cursos de verán do Servizo de Deportes

O Servizo de Deportes abriu este luns 11 para os membros da comunidade universitaria o prazo para inscribirse nas distintas actividades de verán que desenvolverá a USC entre maio e xullo. A partir do próximo 18 o prazo estenderase ao colectivo de persoas alleas á universidade compostelá interesadas.

A duración dos cursos inicialmente previstos, á espera de novas propostas, é variable: ioga, pilates e ximnasia terapéutica celebraranse ao longo dos tres meses, mentres que os de autodefensa feminina, aerobic/step, GAP/tono, Kung fu, mantemento, mellora da condición física, Tai chi e zumba/cardiodance concentraranse en maio e xuño. Finalmente, no mes de xuño está programado o de running. O número mínimo de alumnos/as para levar a cabo as actividades é seis.

Para inscribirse en calquera actividade deportiva é necesario estar dado de alta como usuario de deportes da USC para este curso académico. A inscrición realizarase na Piscina Universitaria (1º Andar), emprazada en Campus Vida, en horario de 9.00 a 14.00 horas. Para acadar máis información, as persoas interesadas poden dirixirse aos teléfonos 881 815 071 ou 881 815 073 (extensións 15071 -15073), ou a través da web do Servizo. A idade mínima para acceder a estas actividades é de 14 anos.