O Colexio de Fonseca retrata as ‘Luces e misterios da Compostela Mística’
“Hai nas madrugadas de Compostela unha hora silenciosa e baleira. Unha hora máxica na que os derradeiros noctámbulos sa xe foron pero os máis madrugadores aínda non chegaron. Unha hora de calados resplandores na que é posible gozar da cidade a solas”. Con estas palabras, o catedrático de Álxebra Antón Rodicio anticipa ao visitante da exposición ‘Luces e misterios da Compostela Mística’ o nexo común das corenta e seis imaxes e dez poemas que ata finais de abril se poderá visitar no Colexio de Fonseca e da que el mesmo é autor. O reitor Juan Viaño preside este xoves 31 o acto inaugural da exposición ás 20.00 horas no Colexio de Fonseca.
Os dous espazos expositivos en que se articula o Colexio de Fonseca recollen á súa vez dous conxuntos fotográficos distintos que “simbolizan a contradición da Compostela histórica”, explica o seu autor. Mentres no Salón Artesoado móstranse instantáneas de exterior do casco histórico “na hora azul do amencer”, na Capela atópanse capturas de espazos interiores, rúas e prazas “escuras, sombrías, surrealistas”, imaxes opostas ás anteriores. A través destes puntos de vista o visitante “ atopará a alma de Santiago, sen coches, sen persoas, só a cidade núa”.
O conxunto de imaxes e textos sobre os que se vertebra o relato de Antón Rodicio comeza a finais de 2014 como manifestación da inquedanza de quen simultanea a docencia e a investigación matemática coa expresión artística. “A matemática ten relación coa arte a través da beleza dos seus conceptos”, se ben cando se atopa entre números “é fría e austera, ten pouco que ver coa alma” sinala Antón Rodicio. Xustifica Antón Rodicio o tránsito entre matemáticas e arte en que “tiven que descender ao concreto, atender a alma”, o que primeiro o levou á literatura e logo á fotografía, ambos ingredientes presentes na exposición.
A partir da súa inauguración este xoves 31, a mostra poderá visitar ata o 30 de abril en horario de luns a sábado de 11.00 a 14.00 horas e de 17.00 a 20.30 horas.