O Campus Terra da USC recibe a empresas dos sectores forestal e alimentario para definir os perfís profesionais do futuro

A Vicerreitoría de Coordinación do campus de Lugo acolle este xoves dous novos encontros con respresentantes empresariais dos sectores forestal e alimentarios, unhas xornadas de traballo quen dan continuidade aos ‘workshops’ celebrados o pasado martes con representantes dos eidos leiteiro, cárnico e gandeiro, e cuxo obxectivo non é outro que o de coñecer cales son os perfís profesionais máis demandados polas empresas, a fin de poder orientar así a oferta formativa e de servizos do Campus Terra da USC.

Os vicerreitores de Coordinación e de Desenvolvemento Científico e Tecnolóxico do campus de Lugo da USC, Javier Bueno e Andrés Barreiro, foron os encargados de recibir os representantes de Confemadera, Grupo Villapol, FINSA e a Asociación de Empresarios da Madeira, coa intención de coñecer as dificultades coas que se atopan as empresas de cara ao recrutamento de profesionais adecuados. Na reunión tamén participou Roque Rodríguez Soalleiro, coordinador do grupo de investigación Unidade de Xestión Forestal Sostible da USC. Estes encontros de traballo céntranse tamén na oferta de servizos de I+D+i do Campus Terra da USC, así como na súa adecuación ás necesidades das empresas. Téntase coñecer máis de preto as necesidades actuais do sector en materia de investigación e servizos tecnolóxicos, a fin de avanzar, deste xeito, na progresiva colaboración das empresas coa USC nos distintos ámbitos de interese e, nomeadamente, cos centros do Campus Terra radicados en Lugo. Durante a tarde, desenvolverase no mesmo escenario unha nova reunión con representantes do sector alimentario na que participarán as empresas Aceites Abril, Congalsa, Cafés Candelas, Panadería Dacunha e Granja Campomayor.