O Campus Terra da USC súmase ás celebracións do Día da Ciencia en Galego cun evento de divulgación científica e humor

O Campus Terra da USC celebra este mércores a primeira edición do programa DivulgaTerra, un evento de divulgación científica promovido en colaboración co Servizo de Normalización Lingüística da USC co gallo do Día da Ciencia en Galego e orientado a dar visibilidade ao traballo desenvolvido polos novos investigadores e investigadoras do campus lucense.

A promoción da utilización do galego como ferramenta para a comunicación científica e outros dos obxectivos principais que busca DivulgaTerra. A primeira edición deste certame desenvolverase a partir das 16:00 horas, no salón de actos da Escola Politécnica Superior do Campus Terra da USC, e consistirá nunha sesión de presentacións científicas cunha duración de 10 minutos cada unha e durante a que doce investigadores e investigadoras exporán os seus relatorios en lingua galega e nun ton ameno e divulgativo. Asemade, de xeito parello á celebración destas sesións de exposición pública das distintas liñas de investigación nas que están a traballar os investigadores/as inscritos como oradores no DivulgaTerra, outros sete estudantes do Campus Terra da USC tamén darán conta do seu labor científico a través de colocación de sete pósters no exterior do salón de actos da EPS, onde poderán ser visitados ata o remate da xornada. O colofón da programación deseñada ao abeiro de DivulgaTerra chegará a partir das 20.00 horas, coa presentación do discurshow Código Sapiens, unha creación de de Xurxo Mariño e Vicente Mohedano que por vez primeira chega a Galicia.