O grupo USCan3D guía este venres un obradoiro de modelado 3D de obxectos reais con móbil ou tableta na SPIN2016

Investigadores do grupo USCan3D, con sede na Escola Politécnica Superior do Campus Terra da USC, guiarán este venres, a partir das 16.30 horas, no Edifico Museo Centro Gaiás de Santiago de Compostela, un obradoiro sobre modelado 3D de obxectos reais con teléfono móbil ou tableta, no marco do evento de emprendemento universitario iberoamericano ‘SPIN 2016 Creando cultura emprendedora’, promovido pola rede universitaria RedEmprendia, na que participan 28 universidadesd e 8 países, ademais de contar co Banco Santander e Universia como aliados estratéxicos.

A directora do grupo USCan3d, Mariluz Gil; o tamén profesor da USC e coordinador do campionato científico internacional D3Mobile, Juan Ortiz, e Teresa Rego, serán os encargados de guiar este obradoiro de modelado 3D con móbil, no marco de que todas as persoas asistentes aprenderán a facer modelos de obxectos reais en tres dimsións co seu propio teléfono móbil ou tablet e unha aplicación gratuíta que traballa na nube.

O modelado 3D a partir de fotografía do obxecto real constitúe unha potente ferramenta de rexistro da información xeométrica do mesmo e xa se trata dun recurso moi empregado por moitos profesionais de todo o mundo e con múltiples aplicacións. Cómpre lembrar asemade que os modelos 3D virtuais son os arquivos dixitais que rexen as impresoras 3D.