GenDR, gañadora do Model2Market Universia, oferta servizos de predición da resposta a fármacos e tratamentos

Os emprendedores da USC Adrián Caamaño Pensado (licenciado en Economía), Juan Vázquez Lago (Medicina), e Ana Latorre Pellicer e Olalla Maroñas Amigo (doutorandas en Biomedicina) son os artífices do proxecto empresarial GenDR, dedicado a ofertar servizos de farmacoxenética, ou sexa, predición da resposta a fármacos e tratamentos mediante unha análise xenética do paciente que permite mellorar a asistencia sanitaria e reducir os gastos derivados.

GenDR foi a merecedora do premio Model2Market Universia que se concedeu no marco de Spin 2016, o maior evento iberoamericano de emprendemento universitario e que tivo lugar en Compostela a pasada fin de semana. Disporán así de 10.000 euros para avanzar no seu proxecto empresarial.

O servizo enfócase a hospitais privados e servizos públicos de saúde que desexen mellorar a asistencia dos pacientes aplicando medicina personalizada, pero tamén a profesionais da área de biomedicina de grandes empresas farmacéuticas implicadas en ensaios clínicos xa que se precisa deses servizos para testar a efectividade real dos novos compostos. A tecnoloxía de GenDR permitiu xa deseñar test específicos máis eficaces (usando un menor número de marcadores xenéticos), o que abarata o custe e reduce os tempos de espera das análises.