A USC e Ferrovial Servicios asinarán un contrato para o desenvolvemento do Plan de Sensibilización Ambiental das áreas verdes da cidade de Compostela

A USC e Ferrovial Servicios asinarán este mércores 14 un contrato para o desenvolvemento de actividades de I+D+i no ámbito do Plan de Sensibilización Ambiental das áreas verdes da cidade de Santiago. O acto protocolario de sinatura deste acordo celebrarase ás 11.00 horas no Salón Reitoral do Colexio de San Xerome coa presenza do reitor da USC, Juan Viaño, e do director xeral de Ferrovial Servicios España. Estarán presentes ademais o profesor da USC Pablo Ramil; o xerente para Galicia de Ferrovial, Alfonso Clemente; e o director rexional da zona norte de Ferrovial, Pedro Martínez Artigas. A través do seu Instituto de Biodiversidade Agraria e Desenvolvemento Rural (IBADER), a USC prestará un servizo de asistencia técnica para desenvolver un programa de actividades relacionadas coa posta en marcha do Plan de Sensibilización Ambiental incluído no servizo de mantemento, conservación e mellora dos espazos verdes e arborado urbano de Compostela que a empresa de servizos ten adxudicado. Por este acordo, a institución académica achegará tanto os medios humanos como materiais necesarios para desenvolver as tarefas asociadas ao Plan de Sensibilización, baixo a coordinación do profesor Pablo Ramil Rego e da profesora Elvira López Mosquera. A vixencia deste acordo estenderase ata o mes de maio de 2018.