O Observatorio Astronómico da USC continúa en agosto o desenvolvemento de TodoCosmos e das Visitas Astronómicas
O Observatorio Astronómico Ramón María Aller da USC (OARMA) desenvolve ao longo dos meses de verán un amplo programa de actividades divulgativas sobre astronomía. Así, a través do proxecto TodoCosmos, co financiamento da Fundación Española para a Ciencia e a Tecnoloxía (FECYT), leva a cabo numerosas iniciativas ao longo de xullo e agosto nos concellos asociados a esta proposta divulgadora. As próximas citas serán no paseo marítimo de Noia, onde está programada este sábado 8 unha sesión de observación pública a partir das 22.30 horas e en Ribadeo, o domingo 9, tamén á mesma hora. Para a semana próxima, os expertos do OARMA desprazaranse a Ordes e Bertamiráns (día 13), Ribadeo (día 15) e Milladoiro (día 16), sempre ás 22.30 horas. O programa de actividades de TodoCosmos comezou a principios do mes de xullo con actividades en diversas localidades galegas como Rianxo, Ames, Pobra do Caramiñal, Vedra, Teo, Noia, Lalín ou Sanxenxo, entre outras localizacións, ademais de nas propias instalacións do OARMA. Como explica o director do OARMA, José Ángel Docobo, o observatorio mantén ao longo do ano unha programación estable con propostas múltiples de divulgación astronómica e que nestes últimos meses achegou a actividade do observatorio universitario a Bertamiráns, Sigüeiro, Carcacía, Vedra, Escravitude, Palas, Carballo, Lalín, Teo, Caldas de Reis, Milladoiro, e especialmente a centros escolares de Noia, Oroso, Rianxo, Ribadeo, Santiago e Teo. Ademais, “foron moitísimas as visitas didácticas recibidas no Observatorio”. Visitas Astronómicas Dando continuidade á proposta de anos anteriores, o Observatorio da USC colabora coa Cidade da Cultura de Galicia ao longo de xullo, agosto e setembro no programa Visitas Astronómicas que en agosto se desenvolverán os días 7, 12, 14, e 21; e 4, 11, e 18 de setembro, e no que o público tamén participará de forma activa en observacións a simple vista e con telescopios. O equipo que leva a cabo todas estas actividades está composto por José Angel Docobo Durántez, Pedro Pablo Campo Díaz, José Ramón González Romay e Jorge Gómez Crespo. O OARMA organiza diversas actividades de observación astronómica ao longo de todo o ano con importante afluencia. Foto: OARMA
