O noso obxectivo é tratar de facer unha primeira aproximación ao importante papel económico que no transcurso dos séculos XVI ao XIX tivo en Galicia o aproveitamento agrícola dos recursos mariños. Do mesmo xeito que noutras zonas do noroeste peninsular ou de diversas sociedades litorais de Europa secularmente, na costa galega sempre tiveron gran transcendencia económica as actividades agromarítimas, ao contribuír ao sustento tanto de campesiños ribeiregos como de xentes do mar. Concretamente, en Galicia, tradicionalmente destacou de forma especial o aproveitamento do denominado -“estercol mariño”- composto por argazo, cunchas, patexo e outros recursos mariños, empregados polos campesiños para abonar os seus campos, a fin de complementar a curta extensión de montes e de gando con que contaban no litoral.