Estudáronse as implicacións sociofamiliares e demográficas da vellez no marco da sociedade galega entre finais da idade media e os inicios da época contemporánea desde unha perspectiva europea comparada. Entre outras cuestións, sacouse á luz a xeografía da vellez e atendeuse ao seu porqué; analizáronse os diferentes elementos que pesaron sobre a representación e a consideración social da vellez; determináronse os niveis de envellecemento poboacional e establecéronse as súas causas; atendeuse ao protagonismo social e familiar da vellez en cada período histórico; determinouse a súa incidencia sobre a reprodución social e familiar ou a natureza e funcionamento dos mecanismos asistenciais que existían tanto no mundo rural como no urbano.