En 1970 aparecía no mundo da investigación a obra As medidas e os homes de W. Kula. O profesor polaco achegaba á análise histórica o fenómeno da medición até a revolución métrica de finais do século XVIII, así como a súa propia evolución ou os seus condicionantes sociais. Para o ámbito galego aparecía dez anos máis tarde a obra de M.I. Fernández Xusto, Metroloxía tradicional galega, facendo unha cartografía do complexo mundo métrico da Galicia reflectida no Catastro da Ensenada. Propómonos agora unha análise social do problema métrico a través dos preitos da Real Audiencia, o máximo tribunal de xustiza da Galicia moderna. Nesta análise debe estudarse necesariamente a temática das causas, así como os seus protagonistas ou as súas vías de resolución.