Ao longo da presente comunicación exporemos unha síntese dos resultados obtidos tras o estudo do inventario post-mortem da fidalga galega dona Vicenta de Tormaleo e Pardo, realizado en 1856, con motivo da repartición dos seus bens entre o seu catro fillas. De todas as casas que se incluían nesta escritura (oito), cinguimos a análise a tres delas, por ser examinadas con maior profundidade nos nosos recentes traballos, e por tratarse dunha investigación en curso. Grazas aos datos que achega a fonte sinalada, poderemos comprobar as diversidades internas (económicas e culturais) deste grupo social, que podía englobar casas apenas diferenciadas do universo rural campesiño, e outras cuxa silueta se destacaba manifestamente do mesmo. Unha boa parte da súa imaxe social era proxectada a través dos interiores das estancias, que indicaban non só os gustos e modas imperantes, senón tamén o nivel económico das persoas que as habitaban.