O interese pola historia da vellez na Galicia da época moderna é recente. De feito, só a partir do ano 2006 se inaugura unha nova etapa coa publicación de estudos específicos sobre esta temática, que coincidían na súa cronoloxía tardía -sempre a partir de mediados do século XVIII-, pero disentían na escala espacial; nuns casos era rexional, noutros, comarcal como no presente estudo centrado en dúas xurisdicións de montaña (Terra de Montes e Terra de Trives). Nas súas páxinas analízase o proceso de envellecemento e de feminización da súa poboación a finais do Antigo Réxime como paso previo á reconstrución histórica do papel familiar e comunitario dos maiores de 60 anos, dos seus recursos económicos, das súas disposicións hereditarias e, finalmente, das estratexias de asistencia na vellez.