‘Coida e Cóidate’, nova campaña para reflexionar sobre a corresponsabilidade e os coidados
Co obxectivo de promover a corresponsabilidade, o benestar e a igualdade entre o estudantado, a Oficina de Igualdade de Xénero da USC lanza a campaña Coida e Cóidate. Preténdese con ela que o estudantado reflexione e responda ás preguntas: como me estou coidando?, estou deixando que me coiden?, estou coidando tamén ás persoas coas que convivo?.
A iniciativa, incluída nas actuacións en execución do Plan Corresponsables, nace a partir dos resultados do Estudo sobre corresponsabilidade na comunidade estudantil, realizado no mes de maio do 2025, que permite identificar dinámicas de convivencia, distribución de tarefas e percepcións arredor dos coidados e do uso do tempo.
O estudo reflicte que moitas persoas compatibilizan estudos, traballo e vida doméstica, cun impacto directo no seu tempo de descanso, que as mulleres seguen asumindo unha porcentaxe maior dalgunhas tarefas condicionando o seu tempo libre e o seu ritmo de vida, e que a maioría detecta marxe de mellora na corresponsabilidade e mostra disposición ao cambio.
Coa campaña Coida e Cóidate, a USC impulsa accións de sensibilización, difusión de información e promoción de hábitos que favorecen unha convivencia máis igualitaria, ao tempo que reafirma o seu compromiso coa igualdade efectiva, coa corresponsabilidade e co benestar integral de toda a súa comunidade universitaria.
