Fondo pesar na USC polo pasamento de José Luis Rodríguez Rodríguez
A USC manifesta o seu fondo pesar polo pasamento do que fora profesor da Facultade de Veterinaria, José Luis Rodríguez Rodríguez.
Incorporouse como docente ao Campus de Lugo no curso 1988-89, cando terminaba a primeira promoción da Facultade de Veterinaria (no que hoxe é a Facultade de Ciencias). No curso 1998-99 obtivo a praza de profesor titular da área de Bioquímica, situación que se mantivo ata a súa xubilación no curso 2022/23.
Foi profesor en diferentes titulacións do campus, incluídas as impartidas na Facultade de Veterinaria. Neste centro deu clases das materias Bioquímica, Bioquímica metabólica e Integración do metabolismo. José Luis Rodríguez Rodríguez foi ademais secretario do Departamento de Bioquímica e Bioloxía Molecular durante o período 2019-2020.
A USC, e moi especialmente a Facultade de Veterinaria, únense á dor da familia e amizades pola perda desta figura fondamente querida pola comunidade universitaria e expresan o seu agradecemento polo traballo e esforzo que desenvolveu no seo da institución.