Preto de 200 persoas toman parte na xuntanza do programa A Ponte con persoal directivo e orientador de Ensino Medio
“Queremos achegar a Universidade aos futuros estudantes”, así definiu o reitor Antonio López a vontade da xuntanza que este mércores, baixo a organización do programa ‘A Ponte entre o Ensino Medio e a USC’, reuniu a preto de 200 persoas entre persoal directivo e orientador dun centenar de centros educativos de Galicia. “A relación co Ensino Medio é para nós fundamental”, subliñou o reitor nunha sesión na que tamén tomou parte o alcalde de Santiago, Xosé Sánchez Bugallo; a vicerreitora de Cultura, Igualdade e Servizos, Mar Lorenzo Moledo; así como o coordinador do Programa A Ponte, Celso Rodríguez Fernández.
A sesión foi seguida por unhas 150 persoas de xeito virtual a través de Teams, e por 25, de modo presencial no Salón Nobre. No transcurso da mesma, déronse a coñecer as ‘Visitas da USC aos Centros de Ensino Medio de Galicia’ que se nutren de charlas informativas que leva a cabo un equipo de colaboradores do programa A Ponte da USC. Cando é posible, nestas presentacións participan antigos alumnos e alumnas de cada centro. O programa A Ponte ponse en contacto con eles/as para ver a súa dispoñibilidade. As charlas están dirixidas fundamentalmente a alumnado de 1º e 2º de Bacharelato e de Ciclos Formativos Superiores, e excepcionalmente ao de 4º de ESO. O prazo de solicitude xa está aberto ata o 8 de novembro, aínda que se atenderán as solicitudes que se fagan ao longo de todo o ano académico.
Charlas temáticas
Na xuntanza tamén se presentaron as ‘Charlas Temáticas’ nas que o profesorado da USC imparte relatorios sobre contidos do seu ámbito docente e/ou investigador, dirixidos a estudantes de Ensino Medio. Os centros poderán facer a solicitude de ata dez charlas por orde de preferencia, tendo en conta que, como criterio xeral, se concederá un máximo de cinco relatorios por centro. Para o Curso 2020-21 o primeiro prazo de solicitude vai dende o 14 de outubro ata o 8 de novembro e agárdase que se poidan chegar a impartir en torno a 600 relatorios xa que os 137 ofertados adoitan repetirse en distintos centros.
Asemade, a USC impulsa a iniciativa ‘A USC Camiña. Xornadas de Achegamento á USC’ consistente nunha mostra da Universidade que se desenvolverá en diversos puntos do territorio galego.
