A sétima Feira de Emprendedoras de Compostela pon luz nas iniciativas centradas na saúde e o benestar das persoas

Repensar a economía desde unha perspectiva que pon o foco na saúde e o benestar das persoas. Ese é o obxecto da nova, xa a sétima, edición da Feira de Emprendedoras de Compostela que nesta ocasión se desenvolveu na Fcaultade de Química baixo o lema ‘Un modelo económico arredor dunha vida saudable’.

A feira, organizada por Woman Emprende co apoio do Concello de Santiago, trae da man unha proposta transformadora que reflexiona sobre como construír a un modelo económico sostible que xire arredor dunha vida saudábel, poñendo no centro as persoas e a súa calidade de vida.

Créase deste xeito unha rede de coñecemento e inspiración arredor da innovación, do emprendemento, da ciencia, da saúde e da sustentabilidade con mulleres emprendedoras, investigadoras, profesionais da saúde, divulgadoras así como con entidades comprometidas co coidado das persoas, con principios de igualdade, xustiza social e feminismo.

A feira inaugurouse nun acto no que participaron o director da Área de Valorización, Transferencia e Emprendemento da USC, José Luís Villaverde, o decano da Facultade de Química, Jesús Sanmartín Matalobos, e a primeira tenenta de alcaldesa do Concello de Santiago, María Rozas Pérez.

O evento recolle proxeccións  sobre o Biopolo A Sionlla e o Colexio Oficial de Psicoloxía de Galicia, así como tres mesas redondas sobre empresas innovadoras no entorno médico e científico ao servizo da saúde, a saúde mental e alimentación consciente e deporte preventivo. Preséntase tamén o libro Mirar de frente.