O centro recibe aos estudantes beneficiarios do seu quinto programa de bolsas de verán, que se desenvolverá durante o mes de xullo.
 |
|
Os novos bolseiros de verán do CiQUS, xunto á directora adxunta do centro, Dolores Pérez (dereita). / A.R. |
O CiQUS inaugurou hoxe a quinta edición do seu Programa de Bolsas de Verán cun acto formal de benvida no salón de actos do centro. En presenza dos investigadores principais encargados de supervisar a os 15 novos estudantes, a directora adxunta do centro, Dolores Pérez, desexou aos recén chegados unha proveitosa estancia e animoulles a gozar da experiencia investigadora involucrándose nas actividades programadas no día a día do centro.
Tras recibir unha breve presentación do CiQUS e os seus programas de formación, os novos bolseiros tiveron ocasión de intercambiar unhas primeiras impresións durante a pausa do café cos titores que guiarán este período de aprendizaxe; posteriormente, os estudantes estableceron o seu primeiro contacto coa investigación experimental asistindo ao preceptivo curso de prevención e riscos, paso previo á súa incorporación á actividade dos laboratorios.
O Programa de Bolsas de Verán do CiQUS está financiado pola Consellería de Educación, Universidade e Formación Profesional da Xunta de Galicia e o programa Santander Universidades.
