A USC e a Federación Galega de Rugby colaboran na organización do partido internacional entre España e Portugal da Copa de Europa de Nacións

O vindeiro 16 de marzo disputarase no estadio de San Lázaro en Compostela o partido internacional da Copa de Europa de Nacións de rugby entre as seleccións de España e Portugal. A organización deste evento deportivo correrá a cargo da Federación Galega de Rugby, para o que a USC lle prestará apoio nos termos que establece un convenio que asinaron hoxe o reitor Juan Casares Long e o presidente da Federación, Ignacio Cociña Iglesias. A Federación Galega, que deixará as entradas ao partido internacional a metade de prezo para a comunidade universitaria, realizará un programa de conferencias sobre este deporte e a súa vinculación coa Universidade (o rugby forma parte da oferta deportiva da USC dirixida especialmente á comunidade universitaria) nos Campus de Santiago e Lugo. A primeira delas, titulada ‘Historias do rugby’, será este xoves 28 ás 20.30 horas no Colexio Maior Fonseca na que Alberto ‘Grifón’, xogador do Pontevedra Rugby Club e responsable das categorías inferiores da Federación Galega, explicará os valores deste deporte desde o seu nacemento ata a situación actual no ámbito internacional. Pola súa banda, a Universidade compostelá cederá para os adestramentos das dúas seleccións as súas instalacións do estadio de atletismo, o ximnasio e unha canle da piscina cuberta. Pon tamén a disposición da federación o estadio e o campo de hóckey para a celebración do torneo Internacional de Veteranos. Por último, cederá dependencias para un máximo de dez concentracións das seleccións galegas que se celebren este ano.