O curso de cata de viños tintos pecha as aulas de Gastronomía Pedagóxica na Universidade de Santiago

Un curso de cata de viños tintos será o último paso das Aulas Activas de Cociña, as aulas de Gastronomía Pedagóxica que se desenvolven na Universidade de Santiago. As clases, no comedor do Colexio de Fonseca, darán comezo este mércores 5. Serán en total 8 horas de curso, que se desenvolverán ademais os mércores 12, 19 e 26 de xuño de 19:45 a 21:45 horas. Ao seu cargo estará Carlos Ximénez de Ferrán, sommelier cunha moi longa traxectoria profesional que inclúe traballo en adegas de Alemaña e de toda España, docencia en numerosos cursos e presenzas en destacados paneis de cata. Esta proposta, aberta a toda a cidadanía, pretende ensinar a cociñar á vez que achegar unha cultura de hábitos de consumo saudables e aumentar o coñecemento do medio e dos produtos. Os seis cursos postos en marcha ata o momento espertaron grande interese, como amosa que todas as súas prazas fosen ocupadas, quedando sempre persoas interesadas fóra deles. Porén, aínda é posible apuntarse ao curso de cata de viños tintos. Actualmente desenvólvense un curso continuo de cociña, que chegará ata o 25 de xuño, e outro monográfico de cociña con froitas e hortalizas. Os cociñeiros Daniel Punzoni e Jorge Carou Horta son os seus docentes principais. Xa remataron os de cociña con arroz, pasta, cociña do mar e sushi. Para conseguir toda a información e formalizar a matrícula, as persoas interesadas deben dirixirse á Área de Cultura da Vicerreitoría de Estudantes, Cultura e Formación Continua, no Colexio de San Xerome, ou chamar aos teléfonos 88181018 e 881811103.