RedEmprendia celebra o primeiro evento internacional dedicado ao emprendemento universitario en Iberoamérica

RedEmprendia celebra este martes e mércores en Madrid o que está considerado como o primeiro evento internacional dedicado ao emprendemento universitario en Iberoamérica, o foro RedEmprendia Spin2012. No desenvolvemento do seu programa mestúranse xunto ás charlas e debates, concursos de ideas e proxectos empresariais, empresas innovadoras ou foros de inversión. No transcurso do foro entregaranse os premios correspondentes ao Premio ‘da Universidade á Empresa’, entre cuxos finalistas se atopa unha empresa respaldada por Uninova. As distintas actividades poden seguirse en streaming, no seguinte enderezo http://streaming.redemprendia.org/. O foro está dirixido a todas aquelas persoas e axentes públicos e privados que teñan interese no emprendemento baseado no coñecemento e o desenvolvemento tecnolóxico, universidades e as súas comunidades, emprendedores, empresas baseadas no coñecemento e a tecnoloxía (C&T), administracións públicas ou inversores de capital risco, entre outros. RedEmprendia

RedEmprendia é unha rede universitaria iberoamericana presidida polo catedrático da USC Senén Barro que busca promover a transferencia de coñecemento, o desenvolvemento tecnolóxico, a innovación e o emprendemento responsable. Na actualidade, está formada por 20 universidades iberoamericanas de sete países (Arxentina, Brasil, Chile, Colombia, España, México e Portugal), Universia –a maior rede de universidades de fala hispana e portuguesa– e Banco Santander, que a través da súa División Global Santander Universidades apoia as actividades de RedEmprendia.