Estudan en Lugo as posibilidades dos cultivos enerxéticos en terreos forestais

Para estudar o grao de desenvolvemento do sector bioenerxético en Galicia e os seus proxectos empresariais este luns 17 na Escola Politécnica Superior de Lugo reúnense expertos nunha xornada técnica sobre cultivos enerxéticos en terreos forestais. Na xornada, organizada pola Plataforma Tecnolóxica Forestal Galega DEVESA en colaboración coa Escola, analizarase tamén o marco lexislativo e institucional de referencia e avaliaranse as necesidades do sector en materia de I+D+i para promover liñas de investigación estratéxicas. A inauguración tivo lugar esta mañá coa participación do vicerreitor de Coordinación e Planificación do Campus de Lugo, Pedro García Herradón; do presidente da Plataforma Tecnolóxica Forestal Galega DEVESA, Esteban Sinde Stompel; do director xeral de Montes, Tomás Fernández-Couto Juanas; e do director da Escola Politécnica Superior, Javier Bueno Lema. A continuación sucedéronse as conferencias ‘A situación do sector bioenerxético en Galicia’ e ‘ A PAC 2013: oportunidades para a bioenerxía’ a cargo do presidente de Engabiomasa, Benito Fernández González, e do director xeral de Agricultura da Comisión Europea, José Manuel Silva Rodríguez, respectivamente.

A sesión da tarde desenvólvese en tres grupos de traballo destinados a identificar liñas e proxectos de investigación e desenvolvemento estratéxicos para o sector: Especies a manexar, produción de material vexetal, silvicultura e estimación de existencias e crecementos en plantacións bioenerxéticas; Áreas potenciais e impactos ambiental e paisaxístico das plantacións bioenerxéticas; e Equipamentos e tecnoloxías nos procesos de cultivo e aproveitamento das plantacións.