Estudantes estranxeiros da USC participan este xoves en Santiago no ‘International Day’

Os estudantes estranxeiros no Campus de Santiago serán estes xoves, 2 de decembro, os protagonistas do International Day que se celebrará nun ambiente distendido e festivo na Facultade de Xeografía e Historia co fin de achegar as súas universidades e culturas á comunidade da USC. Esta xornada, organizada en colaboración coa Asociación Enxebre Compostela, celebrarase o vindeiro día 14 en Lugo. Nesta segunda convocatoria do International Day está confirmada a presenza de estudantes de Italia, Polonia, Inglaterra, Rusia, Xeorxia, México, Perú, Chile, Arxentina, Nicaragua, Bolivia, Venezuela, Turquía, Uzbekistán, Kazajistán e Tajikistán. Os estudantes deses lugares presentarán os seus países de orixe, con referencias á xeografía, historia, gastronomía e mesmo á vida estudantil en diferentes postos e presentacións preparadas por eles mesmos. A inauguración terá lugar ás 11:30 horas no claustro da planta baixa da Facultade nun acto que preside o reitor, Juan Casares Long. A continuación, e ata a hora do almorzo (con pratos típicos elaborados polos estudantes), terá lugar a primeira serie de presentacións, que se repetirá pola tarde. A xornada rematará no Café Concerto Retablo (Rúa Nova, 13), ás 22:00 horas, coa entrega de premios aos mellores stands e presentacións. Coa celebración desta xornada preténdese que os estudantes, docentes e persoal da USC coñezan de primeira man outros países, así como as oportunidades de estudo e traballo que ofrecen a través do contacto directo e o intercambio de experiencias cos alumnos estranxeiros.