Ábrese o prazo para participar nunha nova edición do Concurso de Ideas Empresariais Innovadoras da USC

O prazo para participar no X Concurso de Ideas Empresariais Innovadoras da USC permanecerá aberto ata o 30 de novembro. Con esta iniciativa a Universidade de Santiago quere premiar a aqueles emprendedores e emprendedoras que presenten as mellores ideas, orixinais e innovadoras, susceptibles de converterse en proxectos empresariais a curto e medio prazo.
A iniciativa diríxese a todos os membros da comunidade universitaria galega e a todas as áreas de coñecemento. Outorgaranse cinco premios de 600 euros valorándose a viabilidade da idea, o carácter innovador, o grao de madurez, o mercado e a posible aplicación das políticas de igualdade.
A inscrición no certame realizarase de forma telemática, cumprimentando o formulario que aparece na páxina web de Uniemprende. Así mesmo, poderase participar imprimindo o documento en liña e entregándoo nos rexistros dos Campus de Santiago e Lugo.