O ciclo sobre a muller como elemento innovador da Ciencia continúa o luns con experiencias innovadoras na docencia da matemática

O ciclo de conferencias sobre a muller como elemento innovador da Ciencia que, organizada pola Real Sociedade Matemática Española (RSME), se inaugura este venres pola tarde na Facultade de Matemáticas continuará o luns, día 17, coa exposición de experiencias innovadoras na docencia da matemática. Intervirán a profesora Aia Rodríguez, do IES de Salvaterra do Miño, e a profesora da USC Elena Vázquez Cendón.
Comezará ás 16:30 horas Aia Rodríguez relatando unha experiencia que xurdiu no primeiro cuadrimestre do curso pasado ao traballar cun grupo de alumnos de Educación Secundaria de Adultos e observar que mostraban unha actitude pasiva ante os contidos que se lles presentaban nas distintas materias, entre elas a matemática. Esta situación motivou á relatora para intentar poñer en funcionamento, durante o segundo cuadrimestre, unha nova metodoloxía didáctica e comprobar, por unha parte se os alumnos se implicaban máis nas tarefas, e, por outra, se adquirían os contidos fundamentais da materia para ese nivel.
A nova metodoloxía, segundo explicará na charla, centrouse na elaboración dun contrato didáctico, a realización de traballos en grupo e a utilización predominante de ‘competencias’ (en termos da nova lei de educación) co fin de darlle unha maior funcionalidade aos contidos da materia. Deste xeito, comezou o segundo cuadrimestre cun único obxectivo: calcular a cantidade de pintura necesaria para pintar o instituto pontevedrés.
As matemáticas da augaPola súa banda, a profesora Elena Vázquez presentará na súa conferencia ás 18:00 horasas contribucións que dende o grupo de investigación de Modelización en fluxos hidrodinámicos da USC leva liderando nos últimos anos, coa metodoloxía de volumes finitos. Dende un punto de vista divulgativo, conectará a innovación matemática achegada coas aplicacións que a motivaron e a validación experimental ou analítica da mesma. Detallarase tamén a conexión cos diferentes grupos multicisciplinares que contribuíron a desenvolver ou aplicar as diferentes achegas.
Segundo comentará na súa charla, os problemas estudados teñen como denominador común a obtención de métodos numéricos para coñecer o movemento da auga en diferentes contextos xeográficos e de aplicacións: as correntes de mareas nas rías galegas, o impacto de roturas de presas para identificar preventivamente as posibles zonas anegadas –dende un contexto europeo–, a rotura de ondas na praia, a análise das correntes nos Lombos do Ulla sobre as poboacións de berberechos ou, finalmente, o comportamento hidrodinámico das escalas de peixes, que son unhas estruturas hidráulicas que lles permiten remontar os encoros ás especies que habitan nos ríos.