Últimas horas para inscribirse no ‘Módulo de orientación laboral para o fomento da empregabilidade’

O proxecto ‘Módulo de orientación laboral para o fomento da empregabilidade’ presenta un programa formativo que traballa distintas competencias persoais e profesionais que se consideran transversais, supoñendo un reforzo á formación formal que se ofrece dende a USC ao estudantado, axudándolles a desenvolver o seu talento e proporcionándolles a posibilidade de adquirir coñecementos e habilidades para facilitar a súa empregabilidade no mercado laboral. Dirixido a estudantes de último curso de grao e máster da área de coñecemento Artes e Humanidades, desenvolverase do 14 ao 24 de febreiro, e o prazo de inscrición remata este xoves 10.

Este é o primeiro de cinco módulos, cada un deles dirixido ao alumnado das diferentes áreas de coñecemento. Este programa está especialmente orientado a estudantes da USC, para os que se presenta unha proposta de diferentes seminarios e obradoiros, baseados no desenvolvemento das capacidades necesarias para facilitar a súa inserción no mundo laboral. Este programa proporcionará a validación de 1 crédito ECTS para estudantes de último curso de grao. En total 25 horas das cales 19 serán teóricas e 6, prácticas.