O consorcio BIOCENPLAS avanza na creación de bioplásticos a partir dos residuos da industria transformadora da pesca
O proxecto BIOCENPLAS (Biorrefinería centralizada para a valorización de efluentes do sector transformador de peixe en forma de bioplásticos) quere demostrar á industria transformadora da pesca que, a través da biotecnoloxía, os efluentes residuais e os subproductos que se xeran constitúen potenciais materias primas para a produción de materiais biodegradables aplicables como substitutos do plástico tradicional. Esta investigación, froito do consorcio formado pola USC a través do Centro Interdisciplinario de Investigación en Tecnoloxías Ambientais (CRETUS), Cetaqua e Centro Tecnolóxico da auga, e liderada por ANFACO- CECOPESCA, botou a andar en decembro do ano pasado co financiamento da Unión Europea mediante os fondos de resiliencia Next Generation a través do Ministerio de Agricultura, Pesca e Alimentación (MAPA) no marco do Real Decreto 685/2021 do 3 de agosto. A vontade deste proxecto é aproveitar os residuos orgánicos —tanto sólidos, como líquidos— que xera a industria transformadora da pesca para obter bioplásticos, concretamente polihidroxialcanoatos (PHA).
O sistema biotecnolóxico proposto en BIOCENPLAS busca contribuír a mellorar a sustentabilidade do sector diminuíndo a produción de residuos e o consumo enerxético, como se pretende nos proxectos financiados con fondos de resiliencia. Nunha primeira etapa, a materia orgánica do residuo convértese en ácidos graxos volátiles, que son o alimento do cultivo microbiano e permiten acumular o biopolímero no interior das células microbianas. O devandito biopolímero, unha vez extraído da biomasa acumuladora, será convertido nun bioplástico para ser utilizado como material alternativo a plásticos convencionais de amplo uso en alimentación como o polipropileno (PP) e polietilenos (LDPE e HDPE).
Reducir o impacto ambiental
“É importante resaltar que a principal vantaxe deste proceso é que os bioplásticos producidos pódense xestionar xunto con outros residuos orgánicos xa que se degradan no medio ambiente en poucos meses, ao contrario que os plásticos convencionais, que poden necesitar centos de anos para completar o proceso, e son responsables dunha importante contaminación química, afectando os seres vivos próximos”, apuntan dende o consorcio. “A substitución dos plásticos convencionais por bioplásticos reducirá significativamente o impacto ambiental actual destes materiais producindo tamén un beneficio social”, engaden dende o CRETUS. O equipo da USC que integra o proxecto está composto por Anuska Mosquera, Almudena Hospido, Héctor Rodríguez e Ángeles Val del Río.
Na actualidade, xa se están xerando PHA doutros subproductos como os agrícolas, isto é, a partir de carbohidratos; con todo, “aquí radica a novidade de BIOCENPLAS, xa que se trata de xerar biopolímeros a partir de correntes máis ricas en proteínas, co cal, a composición final do biopolímero será distinta e por tanto as súas potenciais aplicacións”, matiza o equipo investigador.
BIOCENPLAS conforma un impulso cara a unha innovación sostible e respectuosa co medio ambiente no sector transformador da pesca e busca apoiar as empresas do sector na súa aposta pola economía circular e a sustentabilidade, reducindo o uso de plástico tradicional e buscando alternativas técnica, económica e ambientalmente viables. “Deste xeito, poderanse cubrir mellor as necesidades empresariais, xa que a actual crise de materiais salienta a importancia da produción in situ das materias primas críticas na cadea de valor de todo produto, incluídos os produtos alimentarios”, matizan. Son varias xa as empresas do sector interesadas en poñer en valor os seus residuos e que apoian este proxecto, tales como Nova Pescanova, Peixes Rubén, Ignacio González Montes, Atunlo ou Mexillóns Nidal.