Alumnado da USC reivindica as materias clásicas no ensino secundario no marco da XXII Mostra Teatro Clásico de Lugo

Un grupo de estudantes que cursan latín e grego na Facultade de Filoloxía da USC reivindican a importancia dos estudos clásicos nos distintos niveis do ensino no marco da XXII Mostra de Teatro Clásico que se está a celebrar no auditorio municipal Gustavo Freire de Lugo, a onde acudiron convidados pola sección galega da Sociedad Española de Estudios Clásicos.

O alumnado da USC presente neste festival de teatro clásico tivo a oportunidade de gozar da interpretación da traxedia de Eurípides ‘Ifixenia en Áulide’, así como da comedia ‘O Persa’, de Plauto. Unha vez rematadas as representacións teatrais, o estudantado da USC subiu ao escenario cunha pancarta na que se podía ler a mensaxe ‘Clásicas sempre en escena, clásicas sempre nas aulas’, a fin de reivindicar a presenza das materias clásicas no ensino secundario, “por formar parte da nosa herdanza cultural e ser o fundamento do nosa esencia europea”.

O alumnado de filoloxías clásicas na USC sumouse así á SOS Clásicas, que busca facer visibles os saberes clásicos polo seu valor formativo, xa que son claves para desenvolver a capacidade de análise e a reflexión crítica, tan necesarias para a formación persoal, e ao mesmo tempo dar a alerta sobre a deriva da educación, que atende máis ao adestramento de técnicos que á formación integral de persoas, subliñan.