A Facultade de Psicoloxía conmemora a festividade do centro cun acto institucional que serve de inicio a un amplo programa de actividades arredor da saúde mental
O Salón de Actos da Facultade de Psicoloxía acollerá o xoves 23 de febreiro ás 12.00 horas o acto conmemorativo do Día da Psicoloxía Académica. O vicerreitor de Transformación Dixital e Innovación, Gumersindo Feijoo Costa, dará apertura a este evento que contará coas intervencións de Hipólito Puente Carracedo, vicedecano do Colexio Oficial de Psicoloxía de Galicia, e Mª José Sampedro Vizacaya, decana da Facultade.
O profesor don José Manuel Sabucedo Cameselle será o encargado de presentar o relator convidado do acto, o catedrático de Psicoloxía Social da Universidade de Sevilla, Manuel Francisco Martínez García, quen impartirá o relatorio 'A realidade migratoria: unha perspectiva psicosocial'. Esta conferencia serve ademais de punto de partida ás xornadas 'Tempo da Psicoloxía' que, do 28 de febreiro ao 3 de marzo, programan un compendio de relatorios e conversas sobre as consecuencias psicolóxicas das migracións. O ciclo, ao abeiro da Semana da Psicoloxía, conta coa colaboración do Colexio Oficial de Psicoloxía de Galicia.
No acto conmemorativo do Día da Psicoloxía procederase tamén á entrega de de insignias e diplomas ao estudantado con premio extraordinario de grao e mestrado do curso 2021-22.