Proxección do documental 'Jorge Prado: Under the Lights'

O salón de actos da Facultade de Humanidades do Campus de Lugo da USC acolle este xoves 9, a partir das 10.00 horas, a proxección do documental 'Jorge Prado: Under the Lights'. A sesión contará coa presenza do piloto coincidindo coa semana do Gran Premio de Galicia de Motocross, que terá lugar os días 11 e 12 de maio e na que o Campión do Mundo de MXGP buscará a vitoria no circuíto que leva o seu nome e ante toda a afección galega.

Jorge Prado participará na mesa redonda que se desenvolverá logo da proxección e responderá as preguntas do estudantado lucense que asista ao acto. A seguir, entre as 11.00 e as 16.00 horas, as persoas asistentes poderán probar no aparcadoiro as motos eléctricas Gas Gas e tentar facerse con dúas entradas para o evento da fin de semana.