O certame ‘Xuventude Crea 2016’ premia tres compañías universitarias da USC

A compañía de teatro da USC GN Teatro é a gañadora da última edición do certame Xuventude Crea na modalidade de Teatro co seu último espectáculo ‘Cabaret Salomé’, unha adaptación musical de ‘ Salomé’ de Oscar Wilde. Na mesma convocatoria, o xurado outorgou ex aequo o segundo premio ás compañías Pincacarneiro, por 'L' e Tik-Tak por 'Des-enlace', igualmente da USC.

Xuventude Crea é certame galego de creadores novos, que inclúe as especialidades de teatro, artes plásticas, fotografía, música, relato breve, poesía, videocreación, banda deseñada, graffiti, deseño de xoias, moda e cociña. Na modalidade de teatro, a convocatoria estaba dirixida a grupos non profesionais, compostos por mozos/as galegos/as ou residentes en Galicia, de entre 16 e 30 anos de idade cumpridos en 2016.