Un seminario sobre castes de vide reúne este mércores na Escola Politécnica investigadores de Galicia e Portugal

Un seminario de castes de vide reúne este mércores na Escola Politécnica Superior do campus de Lugo da USC relevantes investigadores galegos e lusos no estudo das variedades de vide en Galicia e en Portugal.

Este seminario monográfico, promovido polo catedrático de Produción Vexetal da USC Santiago Pereira Lorenzo, desenvolverase en quenda de mañá, de 10.00 a 12.00 horas, na aula 9 da Escola Politécnica Superior. As distintas sesións serán impartidas pola profesora e investigadora portuguesa da Universidade Tras os Montes Alto Douro Isaura Alberta Oliveira De Castro, que está a completar unha estadía de investigación na EPS, e por Emilia Díaz Losada, investigadora da Estación de Viticultura e Enoloxía de Galicia (Evega).

As dúas relatoras convidadas a participar neste foro sobre castes de vide informarán, entre outras cuestións, sobre datos e conclusións de estudos comparativos de cultivares de vide do Oeste da Península Ibérica realizados mediante o emprego de marcadores moleculares.