Xornada informativa na EPS sobre a convocatoria Iniciativa Xove 2015 e o programa de prácticas remuneradas Galeuropa

A Escola Politécnica Superior do campus de Lugo da USC acubillará este martes 21 de abril unha xornada informativa e de divulgación sobre a convocatoria Iniciativa Xove 2015 e o programa de mobilidade internacional xuvenil de prácticas Galeuropa.

A sesión, promovida pola Vicerreitoría de Servizos Universitarios do campus de Lugo, desenvolverase a partir das 11.00 horas no salón de actos da Escola Politécnica Superior e estará guiada polo dinamizador xuvenil Borja Rubio Somoza, da Rede Galega de Dinamización Xuvenil. Rubio Somoza informará ao público asistente das características, así como das novidades que presentan cada unha destas convocatorias orientadas a mellorar as expectativas de emprego da mocidade e nomeadamente, de estudantes e titulados universitarios do SUG.

A vicerreitora de Servizos Universitarios do campus de Lugo, Carme Silva Domínguez, abrirá esta sesión informativa coa presentación do relator Borja Rubio, quen, de seguido, fará unha presentación do programa Galeuropa, a través do que a Xunta de Galicia concede axudas para a realización de prácticas formativas remuneradas en entidades e empresas de países europeos, así como das achegas arbitradas a través do proxecto Iniciativa Xove, orientado ao desenvolvemento de ideas e proxectos de interese para a mocidade e para o conxunto do sociedade.