Alumnado do Máster de Ciencias da Educación visitou o MUPEGA no seu décimo aniversario

O alumnado da materia ‘Persoas maiores, memoria comunitaria e patrimonio educativo’ do Máster Universitario en Investigación en educación, diversidade cultural e desenvolvemento comunitario visitou o pasado venres o Museo Pedagóxico de Galicia (MUPEGA), que celebra o seu décimo aniversario. A visita consistiu no percorrido guiado por espazos expositivos como a imprenta escolar, as escolas chegadas de alén mar e a exposición temporal dedicada ao décimo aniversario do Museo coa intención de debagar a orixe das experiencias educativas narradas polas escenas expostas e, sobre todo, o seu valor dende o punto de vista museístico e histórico. Dedicouse tamén un tempo a coñecer o mantemento dos fondos non visitables do museo e as tarefas de conservación. O grupo estivo acompañado polo profesor Vicente Peña Saavedra, un dos docentes da materia e o primeiro coordinador científico do MUPEGA. Dende a redacción do documento marco ‘Bases e anteproxecto para a creación do Museo Pedagóxico de Galicia’ en 1999 sustentou o proxecto durante os oito anos seguintes tal e como el mesmo conta no libro dedicado aos 10 anos do Museo Pedagóxico de Galicia (Consellería de Cultura, Educación e Ordenación Universitaria, 2014).