‘Tres días de galerna’, un musical resultado dun traballo fin de grao da USC

O que comezou como un traballo de fin de grao de Comunicación Audiovisual e Xornalismo acabou finalmente materializándose no musical universitario ‘Tres días de galerna’ que, coa implicación dun grupo de 16 alumnos e alumnas da USC, se estreará o día 25 no Teatro Principal de Santiago. Trátase dun espectáculo ambientado nunha cidade costeira da Galicia dos anos 60 no contexto dunha sociedade atrasada e reprimida debido á ditadura fascista no que dúas amigas, a piques de entrar na universidade, deberán lidiar coa súa recén descuberta sexualidade. A selección musical componse de temas españois dos anos 60 versionados pola banda para adaptalos ás necesidades do proxecto. A estrea terá lugar o 25 de xuño ás 20.30 horas no Teatro Principal de Santiago de Compostela e todos os beneficios recadados serán doados á Cociña Económica de Santiago.